Ginkumpirmar sang Office of the Civil Defense (OCD) Region 6 nga tanan sa mga probinsya sa Western Visayas ang naga-eksperyensya sang drought magluwas lamang sa Aklan nga nagapabilin sa dry spell.
Sa interview sang Bombo Radyo Bacolod kay Cindy Ferrer, information officer sa OCD Region 6, sa latest situational report as of April 11, ang datos sa Emergency Operation Center ang nakarecord na sang P770.5 million nga kahalitan sa sektor sang agrikultura.
Ang pinakadako nga nahalitan amo ang probinsya sang Iloilo nga nagdangat sa P519 million, Antique nga P130 million kag Negros Occidental nga may kahalitan nga balor P78 million.
Apang paathag sini nga nagahulat pa ang ahensya sang update gikan sa Department of Agriculture.
Suno kay Ferrer, mayorya sa mga nahalitan sa Western Visayas amo ang mga humay, mais kag iban pa nga high value crops, kag may pila man nga nahalitan nga katubuhan.
Aminado ini nga madamo sang mga humayan partikular na sa Iloilo nga ginakabig rice granary sang pungsod, ang nagasalig lamang sa tubig ulan.
Sa pihak sini, may mga mitigation kag preparedness measures ang Department of Agriculture, kag sila ang nagahatag man sang assistance kag alternative source sang tubig.
May pila man ka lugar nga naka-eksperyensya na sang water shortage kaangay sa Himamaylan kag Bacolod City, nga nagapatigayon na sang water rationing.
Nakaligad nga semana, ila man nga ginpadulungan ang ciudad sang Himamaylan agud lantawon ang sitwasyon.
Ang mga apektado sang El Niño nga mga pamilya sa Western Visayas ang nagdangat sa 25,948 ka pamilya ukon 120,505 individuals gikan sa 497 ka mga barangay.
Samtang nagdangat naman sa 20,610 ang mga apektado nga farmers kag fisherfolks.
Pahanumdom sang OCD 6 nga padayun lamang nga magmonitor sa epekto sang El Niño agud makapreparar.
Pahayag sini nga ginalantaw nga magapadayun pa tubtob sa Mayo ang El Niño kag amat-amat naman nga magashift sa La Niña.
Pangabay lamang ni Ferrer nga indi maghalin sa Pilipinas ang tuman ka lala nga mga bagyo kag mga pagbaha.
