Nag-file sang motion for reconsideration ang mga prosecutor sang Office of the Ombdusman kag duha ka anay opisyal sa Department of Public Works and Highways (DPWH) Bulacan First District Engineering Office sa Sandiganbayan Third Division nga bawion ang desisyon nga pagpahanugot kay former Senator Bong Revilla nga makapiyansa sa kaso nga malversation angot sa ghost flood control project sa Pandi, Bulacan.
Gintawag nga “ghost project” bangud sa tion sang inspection sang anti-graft court justices, natukiban nga wala sang aktwal nga istruktura nga ginpatindog sa lugar apisar halos nabayaran na ang bug-os nga balor sang proyekto kag gindeklarar nga tapos na.
Apang, gintugutan sang Sandiganbayan si Revilla nga makapiyansa sang nakaligad nga semana.
Santo sa korte, wala nakapresentar ang prosekusyon sang biskan gamay nga ebidensya nga nagapamatuod nga may kasugtanan ukon direkta nga ihibalo si Revilla sa pagbaton sang kickback naggikan sa proyekto.
Nakita sang Sandiganbayan nga may indikasyon sa mga ebidensya nga may ihibalo si Revilla nga posible nga mabawi sang mga contractor ang kwarta nga gingasto ukon ginpagwa nila sa proyekto gikan mismo sa pondo sang gobyerno.
Apang para sa korte, indi ini supisyente nga basehan para sa kaso kag para punggan si Revilla nga makapiyansa.
