Temporaryo nga nakagwa sa prisohan si anay Senator Ramon “Bong” Revilla Jr. matapos magpiyansa sang P1 million para sa iya ginaatubang nga kaso nga malversation.
Gin-aprubahan sang Sandiganbayan Third Division ang iya petisyon para sa temporaryo nga kahilwayan samtang nagapadayon ang trial.
Nakahalin ini sa Quezon City Jail Male Dormitory sa Payatas pasado alas-6:00 kagab-i, Hulyo 31.
Santo sa desisyon sang korte, gintugutan si Revilla nga makapiyansa bangud napaslawan ang prosekusyon nga magpakita sang mabakod nga ebidensya batok sa iya.
Madumduman nga nagapangatubang sang mga kaso nga graft kag malversation si Revilla angot sa anomaliya nga P92.8 million “ghost flood control project” sa Pandi, Bulacan, nga makapila naman ka beses niya ginpanginwala.
Ang petisyon lamang ni Revilla ang gin-aprubahan samtang rejected naman ang aplikasyon para sa piyansa sang iban pa nga akusado.
Una na nga nakabayad si Revilla sang P90,000 nga piyansa para sa magkatuhay nga kaso nga graft sa idalom sang Fourth Division.
Bangud aprubado na man ang iya P1-M bail para sa malversation, nakapauli gid ini sa ila puluy-an kagab-i.
Ginpakigbahin man niya ang litrato kaupod ang iya pamilya sa iya una nga Facebook post matapos ang desisyon sang anti-graft court division kag nagpasalamat ini sa Diyos.
