Nagpagwa ang gobernador sang probinsya sang Negros Occidental sang special advisory para sa preparasyon sa paglabay sang Tropical Depression Queenie nga nagasunod kay Bagyo Paeng.
Sa interview sang Bombo Radyo Bacolod kay Dr. Zeaphard Gerhart Caelian, pinuno sang Provincial Disaster Management Program Division (PDMPD), ginaabisuhan ang publiko kag mga Disaster Risk Reduction and Management Office (DRRMO) nga imonitor ang pinakaulihi nga ginpagwa sang PAGASA ukon sa advisories nga ginapagwa sang Provincial Command Center sang Provincial Disaster Risk Reduction and Management Council.
Nagpanugyan man ang gobernador nga mag-aligmat sa mga tumalagsahon nga pag-ulan nga tuga sang Bagyo Queenie kun ini ang masulod sa PAR.
Ginapanugyanan man ang mga nagaistar sa higad sang baybay ukon pangpang sang suba nga mag-alerto sa mabaskog nga hangin kag pagpangilat kag pagpanaguob kag magtawag sa emergency number nga 911 sa tion nga may emerhensya.
Nagapanawagan man ang gobernador nga likawan ang mga kaswalidad bangud man pagpabaya.
Ginpahayag man sa advisory nga magsunod sa mga panugyan sang mga otoridad sa tion sang kalamidad.
