Wala sang may nabatian nga lupok ang mga residente malapit sa balay ni Police Lt. Col. Romeo Vargas sa purok Zone 12, barangay Handumanan, Bacolod City.
Sa interview sang Bombo Radyo kay Barangay Kagawad Rommel Exanes, ginsugiran ini sang rescue team nga may insidente nga natabo kag gilayon ini nagpadulong sa balay ni Vargas.
Suno diri, wala na ini nakasulod bangod yara na ang pulis kag nakordon na ang lugar.
Suno kay Exanes, nagatrabaho bilang principal sa isa ka buluthuan sa lain nga Local Government Unit ang asawa ni Vargas kag may isa sila ka bata nga babayi.
Suno pa diri, kun kaisa magkaupod sila ni Vargas magkape-kape kag nagmensyonar ini nga luyag na niya magretiro.
Wala naman nagapati si Exanes nga gin-utas ni Vargas ang iya kaugalingon nga kabuhi bangod estable man ini sa pagpangabuhi.
Pahayag sini, ang iya balay malapit lamang sa balay ni Vargas kag wala man sang may nabatian nga lupok.
