Ginbaton ni President Ferdinand Marcos Jr. ang resignation ni Vice President Sara Duterte bilang tiglikom sang Department of Education kag bilang miyembro sang iya Gabinete.
Suno naman kay Presidential Communications Secretary Cheloy Garafil, ginbaton ni President Ferdinand Marcos Jr. ang desisyon ni Duterte kag wala naman naghatag ang bise-presidente sang rason sa iya pagbiya sa Gabinete kasubong man bilang Vice Chairperson sang NTF-ELCAC epektibo Hulyo 19, 2024.
Suno kay Garafil, si Duterte ang magapadayon naman sa iya mga obligasyon bilang bise-presidente.
Sa madumduman, gin-ako ni First Lady Liza Marcos nga wala ini nagakumporme sa ginhambal sang amay sang bise presidente nga si former President Rodrigo Duterte, nga “bangag” ukon nagagamit sang illegal nga druga ang bana sini nga si President Marcos gani bad shot na sa iya si Sara.
Sang Pebrero, ginpahayag sang bise presidente nga wala ini sang isyu kay Marcos apisar sa natabo nga pagpanuya sang amay sini kag sang iya utod nga si Davao City Mayor Sebastian ”Baste” Duterte sa presidente.
Aminado naman si Senate President Francis Escudero nga inevitable ukon indi na malikawan ang pagresign ni Duterte matapos ang pagsuya sang iya nga pamilya kay Marcos kag pagpili sini nga maghipos sa mga issues kaangay sang West Philippine Sea conflict, Bagong Pilipinas Hymn, Quiboloy cases kag attempted arrest kag iban pa.
Suno kay Escudero, may kinamatarong si Sara nga magsipak sang iya nga policy sa iya sang presidente.
Nagpanawagan naman si Minority Leader Aquilino “Koko” Pimentel III kay Marcos nga mag-appoint sang secretary nga dedicated sa edukasyon kag makapakita sang iya nga track record para diri.
Suno kay Pimentel, kinahanglan nga magpreparar na gilayon si Marcos sa pag-appoint sang masunod nga DepEd secretary.
