Isa na lamang sa 15 ka mga stalls sa Manokan Country ang nagapabilin nga sirado apang ginalauman nga magabukas man subong nga adlaw.
Madumduman nga kahapon sang udto, ginsiraduhan sang City Legal Office ang mga stalls nga gina-okupar sang mga tenants nga wala nakabayad sang ila mga arrears sa ciudad.
Suno kay Ray Demasana, pinuno sang Enforcement Team sang City Legal Office, wala nakahingagaw pasa sang iya mga dokumento kahapon sang hapon si David Montoya, nga amu man ang nagatindog nga Presidente sang Manokan Country Vendors Association, rason kun ngaa wala nabuksan ang iya nga stall kahapon.
Suno kay Demasana, kumpleto naman ang mga dokumento ni Montoya apang wala lamang ini nakahingagaw submit sang compromised agreement antes mag-alas 5:00 sang hapon.
Suno diri, kun macomply na sini ang requirements, gilayon man nga maka-operate liwat ang iya baligyaan.
As of September 2022, may yara sang P698,783.70 nga arrears si Montoya apang sang Setyembre 2, ini ang nagbayad sang P20,200.
Sa karun may yara na lamang ini sang balance nga P678,583.70.
Ginpahayag naman ni Montoya nga dululungan sila kahapon padulong sa City Treasurer’s Office agud magpasa sang compromised agreement apang bangud nga nagatrabaho ini sa Central Negros Electric Cooperative (CENECO), siya ang nagbalik pa sa ila opisina.
Sang pabalik na ini sa City Treasurer’s Office, siya ang naabtan sang traffic gani wala ini nakalab-ot on time.
Suno diri, nacomply na sini ang iya mga requirements kag nanotaryohan naman ang iya compromised agreement gani igapasa na lamang niya ini subong nga adlaw sa City Treasurer’s Office agud makabukas ang iya stall.
Suno sa iya, sang tinalikdan nga Miyerkules, nakighinun-anon sa ila si Councilor Celia Flor, chairman sang Committee on Markets and Slaughterhouse, kag gin-abisuhan ang mga ini nga magpadulong sa City Treasurer’s Office sa Oktubre 1.
Ulihi na lamang nila narealisar nga Sabado gale ini nga adlaw kag wala sang opisina gani naistoryahan sang mga vendors nga sa Lunes na lamang magpasa apang naunahan sila sang City Legal Office kag ginsiraduhan ang ila mga stalls.
