Nagahingyo ang sugar industry leaders sa Negros Occidental kay President Bongbong Marcos nga pasakaan ang suggested retail price sang refined sugar agud nga makabawi man ang mga planters sa halit nga ginbilin sang Bagyo Paeng.
Sa interview sang Bombo Radyo kay Manuel Lamata, presidente sang United Sugar Producers Federation (UNIFED), nagpasugot sila sadto nga panubuon sa P70 ang presyo sang refined sugar ilabi na sa supermarkets.
Apang bangud sa naglabay nga bagyo kag nabahaan ang mga plantasyon sang tubo, naganubo ang produksyon sang 10 porsyento kada sako.
Bangud sini, nagapanawagan sila kay President Bongbong Marcos nga ipasaka ang presyo sang kalamay nagikan sa P70 padulong sa P85 padulong sa P90 agud nga mangin P60 ang mill gate price.
Suno sa UNIFED president, nagsulat na sila sa presidente angot sa hingyo kag ginakuha na ang tanan nga rekomendasyon angot diri.
Suno kay Lamata, P2,800 tubtub P2,900 nalang ang mill gate price sang kalamay subong bangud tunga-tunga na sang milling season, samtang mahal naman ang presyo sang abono.
Kun P70 ang retail price sang refined suno kay Lamata, mahimo nalang nga P2,500 ang mill gate price sang raw sugar.
Samtang kun P85 tubtub P90 naman ang retail price sang refined sugar, P3,000 ang mill gate price bangud madamo pa ang ginagastuhan sang nagaparefine sang raw sugar tubtub makalab-ot ini sa merkado.
Sang nahibaluan ni Lamata nga may mga retailers pa sa Bacolod nga nagabaligya sang refined sugar sang P100 kada kilo, ginpanindugan sini nga dapat panubuon na ang presyo bangud tunga-tunga na sang galing.
