Indi magnubo sa lima ka mga suspetsado ang nagpatay sa 14-anyos nga sulterito sa Abada Escay, Barangay Vista Alegre, pasado alas-10:00 kagab-i.
Ang biktima ang ginkilala kay Joel Bayotas, isa ka Grade 7 student sa amo man nga barangay.
Sa interview sang Bombo Radyo kay Police Capt. Elmer Bonilla, station commander sang Bacolod Police Station 7, may nagpahibalo nga may shooting incident sa lugar kag sa ila nga pagresponde, wala na sang kabuhi si Joel Bayotas sa kilid sang creek.
Narekober sa crime scene ang empty cartridges sang caliber .45 pistol kag carbine.
Sa pag-usisa sa mga residente sa lugar, natukiban nga indi magnubo sa lima ang numero sang mga lalaki nga nagasakay sa pribado nga salakyan nga nag-abot sa lugar kag nangsita.
Nagdalagan si Bayotas apang ini ang gintiro bisan wala man sang komprontasyon, tubtub nga nakalab-ot ang menor de edad sa idalom sang creek kag didto na siya ginbawian sang kabuhi.
Gilayon man nga nagbiya sa lugar ang mga suspetsado sang napatay na ang biktima.
Suno sa mga residente, puti nga L300 van ang ginsakyan sang mga suspetsado kag nacapture man ini sang CCTV camera apang blurry ang footage.
