Liwat nga magaayo ang mga tenants sa Manokan Country sa city government sang Bacolod sang dugang nga panahon agud nga makabayad sang ila utang sa syudad.
Sa interview sang Bombo Radyo Bacolod kay David Montoya, presidente sang mga tenants sa Manokan country, nakahinun-anon na sila kay Councilor Celia Flor, chairman sang Markets and Slaughterhouse sa Sangguniang Panlungsod kag naghingyo ang mga ini nga maamat-amatan nila bayad ang ila arrears ukon utang sa syudad.
Suno kay Montoya, nag-OK man si Councilor Celia Flor sang gin-ayo nila nga unahon nila kabayad ang 20 percent sang ila nga utang.
Nakabayad naman sila sang tag P5000 kag padayunon nila tubtob sa katapusan sang bulan kun sa diin makompleto nila ang pagbayad sang 20 percent sang ila arrears.
Suno diri, maset naman liwat sang meeting si Councilor Celia Flor sa ila sa Huwebes, Setyembre 15 kun sa diin, maga-ayo sila liwat sa konsehal nga mahatagan sang dugang nga panahon agud nga makompleto sang mga ini bayad ang ila account sa syudad.
Ginpahayag man sini nga may kabudlayan man sila bangud diutay man ang ila nga ginakita bangud ang ila pwesto ang nahamtang sa nalikod nga bahin sang manokan country.
Nagapanawagan man ini sa pareho niya nga tenants nga seryosohon ang pagbayad sang utang bangud mahimo nga indi na magpasugot ang syudad nga hatagan sila sang dugang nga tion para mafully paid ang ila nga utang.
