Nagpasalamat ang mga tenants sa Manokan Country nga may yara pa sang utang sa Bacolod City government nga gin-extend ang deadline para sa pagbayad sang ila nga arrears.
Subong kuntani nga adlaw, Setyembre 30, ang deadline para sa pagbayad sang arrears nga nagtingob na sa sulod sang pila ka tuig.
Sa interview sang Bombo Radyo kay David Montoya, presidente sang Manokan Country Vendors Association, nagmeeting sila sa chairman sang committee on markets and slaughterhouse sa Sangguniang Panlungsod nga si Councilor Celia Flor kag nagpasugot naman si Mayor Alfredo Benitez sa ila ayo nga iextend ang deadline sang pagbayad tubtub Disyembre 30.
Bwas nga adlaw, Oktubre 1, magapirmahanay ang tiglawas sang mga tenants kag mga city officials sang compromised agreement nga magabayad sila tubtub Disyembre 30 agud nga makakuha sang business permit.
Naghingyo ang mga ini nga bayaran ang 20 percent sang total arrears tubtub Disyembre 30.
Santo sa nauna nga data, indi magnubo sa P500,000 tubtub P600,000 ang arrears sang kada tenant.
Nagikan sa 21 ka mga tenants sa Manokan Country, apat na sa ila ang nakabayad sang full antes ang bulan sang Setyembre samtang may dugang nga tatlo naman ka tenants nga nakafully paid antes ang subong nga adlaw.
Suno kay Montoya, handa na sila para sa MassKara Festival kun sa diin ginalauman nga magadamo ang mga bisita.
