Magahatag sang 10 porsyento nga discount sa monthly rent sang mga tenants sa Manokan Country ang Bacolod City Government nga advance ang mga ini nga makabayad kada bulan.
Suno kay Councilor Celia Flor, chairman sang Committee on Markets and Slaughterhouse, bukas na ang tanan nga stalls sa Manokan Country matapos nagperma kag nagpasa sang compromised agreement nga sila ang magabayad sang P25,000 kada bulan para sa ila arrears tubtob nga ini ang mafully-paid.
Magluwas diri, sila ang magabayad man sang monthly rent nga P2,250.
Apang suno sa konsehal, maga-ubra ini sang resolusyon nga kun mag-advance payment ang isa ka vendor sang monthly rent, maka-avail ini sang 10 percent nga discount.
Makigkita man si Flor sa mga tenants agud istoryahan kun paano pa maimprove ang ila pagbaligya kag negosyo.
Suno diri, magapangita ini sang mentoring program kag mga pamaagi agud makabulig ang ciudad sa ila kaangay na lamang kun may problema sa supply ang manok, magapangita ang city government sang barato nga supplier.
Ginpahayag man sini nga nagaplano ang ciudad nga pataasan ang monthly rent sa Manokan Country sa 2023 bangud pila naman ka tuig nga wala ini natigayon.
