Sugot nga magsaylo ang kadam-an sa mga vendors sang Talisay City Public Market, apang aminado ang mga ini nga mangin mabudlay ang ila bag-o nga panugod.
Sa pahayag ni Market Supervisor 3 Jonathan Sansing, sa Mayo 15 kuntani saraduhan ang daan nga merkado agud magsaylo sa bag-ong tukod nga Public Market sa Brgy Zone 12A, Talisay City.
Apang ini ang ginpostpone sa Hunyo 1 bangod may-ara pa sang kinahanglan nga tapuson.
Sa interview sang Bombo Radyo Bacolod kay Paterno Gallenero Jr., meatshop vendor, nakita na nila nga matahom ang bag-o nga merkado.
Ginapakamaayo man sini nga bukas ang alkalde sa hingyo sang mga market vendors nga may wala pa nabayaran nga arrears, nga sila ang makasaylo.
Ang bag-o nga merkado ang makacater sang 523 business owners.
Apang aminado man si Gallenero nga sila ang magakinahanglan pa nga mag-adjust sa bag-o nga pwesto.
Suno diri, gubadon na kag ginabaha ang daan nga merkado.
Nagalaom naman ini nga magapanultol gihapon ang mga konsumedor. Samtang., indi kuntani luyag nga magsaylo sang pila ka manugbaligya sa Talisay Public Market, apang wala na sang mahimo kundi ang magsunod na lamang.
Ini matapos nakapagwa na sang resolusyon ang Talisay City Government nga buksan na ang bag-o nga merkado sa Brgy Zone 12A, Talisay City, malapit sa City Hall sa Hunyo 1, kag mahimo nga gub-on na ang daan nga merkado.
Sa interview sang Bombo Radyo Bacolod kay Wilson, fish vendor, naplastar na ang bag-o nga pasilidad, gani sa tion nga magmando na sa pagsaylo sila ang magasunod man.
Apang aminado ini nga dako nga kabudlayan sa bag-o nga merkado ang salakyan, bangod ini ang suludlon nga lugar.
Pahayag sini nga dapat maseguro nga may masakyan kag safe nga makabyahe pasulod sa area ang mga konsumedor bisan pa sa tion sang hapon.
Suno naman kay Reneboy Quenquero, nagapati ini nga bisan ano pa nga pamalabag ang ila himuon, sayluhon sila gihapon sa bag-o nga merkado, gani ini ang maga-sunod na lamang.
Apang ginakasubo sini nga sila ang magabalik gid sa panugod.
Dugang pa niya nga mas mahal na ang ila pagabayaran, kag separado pa ang bill sa tubig kag kuryente.
Indi kaangay sa daan nga merkado kun sa diin P15 lamang ang ila bayad sa stall kag P10 sa kuryente.
Dugang pa sini nga may bayad naman sa pagpasulod sang isda, kag mas magadako ang travel cost, gani lauman naman nga mas magamahal ang presyo sang isda.
Aminado ini nga sa pagdugay maka-adjust man sila kag ang bumalakal, apang kun ikumparar sini, siya ang mas pabor sa daan nga merkado bangod yara sa sentro sang komersyo kag alagyan lang sang mga tawo.
Suno diri, sa pagkadto sa bag-o nga merkado, kinahanglan pa sang mga konsumedor nga magbyahe pasulod kag paggwa sa area.
