Nakuha sang Western Visayas ang bulawan nga medalya sa 110 meter hurdle secondary boys sa pagdaog ni Mico Villaran sang Negros Occidental.
Sa interview sang Bombo Radyo Bacolod kay Coach Miguel Arca, si Villaran man ang nagdaog sa amo nga competition humalin sang Palarong Pambansa 2023 tubtob sa karun.
Suno diri, indi lamang tatlo ka asod-asod nga nakuha ni Villaran ang bulawan nga medalya apang sa karun nalapawan man sini ang iya record sang tinalikdan.
Pahayag ni Arca, wala pa naka-umpisa ang competition, ginalauman na nila nga makuha ni Villaran ang gold medal kag mabreak sini ang iya record.
Samtang, tuman naman ang kalipay ni Mico Villaran nga makuha ang madugay na nila nga ginahandum.
Suno diri, pila ka tuig ang ginhulat nila tubtob nga malab-ot ang iya bag-o nga record.
Ini tanan ang bunga sang iya training halin sa drilling, long sprint kag short sprint kag iban pa samtang ang pahuway sini ang isa lang ka adlaw kada semana.
Si Villaran ang tumandok sang Hacienda Bacong, Barangay Matab-ang, Talisay City kag naga-eskwela sa Romanito Maravilla National High School sa brgy Estefania, Bacolod City.
