Wala na nagdugang sang pwersa ang Philippine Army sa banwa sang Moises Padilla bisan ginpaidalum na ini sa Comelec Control, Lunes nga adlaw.
Sa interview sang Bombo Radyo kay 303rd Infantry Brigade commander Brigadier General Benedict Arevalo, ginpahayag sini nga bastante na ang 150 ka mga suldado nga gindeploy sa Moises Padilla antes pa man ang deklarasyon sang COMELEC control.
Madumduman nga sang ulihi nga semana sang Abril, ginpadala sa Moises Padilla ang 150 ka mga suldado kasunod sang pag-ambush sa convoy ni Vice Mayor Ella Celestina Garcia-Yulo nga nagresulta sa kamatayon sang iya utod kag hinablos.
Suno kay Arevalo, indi magnubo sa 200 ang security forces sa Moises Padilla bangud nagdeploy man ang Philippine National Police sang 50 ka mga pulis.
Ang 150 ka mga suldado ang gin-assign sa security operations sa mga kabukiran kag iban pa nga mga remote areas.
Ila pagatutukan ang mga polling centers kag precincts kalakip man ang mga strategic areas kasubong sang mga crossing kag junctions pagwa sa banwa sa pamaagi sang paghiwat sang checkpoint operation sa adlaw kag gab-i.
