Ginbaton sang misis ang challenge sang iya mister nga madonar sang dugo sa Dugong Bombo 2026 gani nangin bonding nila ini kahapon.
Suno kay Marissa Illorin sang Barangay Sum-ag, Bacolod City, ini ang una nga kahigayunan nga nagdonar siya sang dugo bangud ginbaton niya ang challenge sang iya bana nga si Nelben nga madonar bangud nagaupod man ini sa iya mister sa tagsa nga magdonar sa sulod sang pila na ka tuig.
Duha ka semana nga ginhandaan ni Marissa ang pagdonar sang dugo bangud nahadlok siya sa dagom.
Suno sa iya, nagahibi ini bisan magpakuha lang sang blood sample para sa laboratory.
Ini ang una nga kahigayunan nga wala nasakitan si Marissa sa tublok sang dagom bangud desidido siya nga magdonar.
Suno sa iya, sa pinsar lang ang sakit kun desidido nga magdonar sang dugo.
Bangud sini, magadonar na si Marissa sang dugo kada tuig.
Suno sa iya bana nga si Nelben, may secret deal sila ni Marissa sa pagdonate.
Nagsugod si Nelben sa pagdonar sa Dugong Bombo sang tuig 2017 kag nagadonar ini kada tuig.
Gin-agda sini ang mga nagapamati nga magdonate gid sang dugo kun kwalipikado agud nga makabulig sa nagakinahanglan.
Suno naman sa retired police nga si Felipe Ignalaga Jr. sang Barangay Alijis, Bacolod City, 64 years old na ini apang naandan na niya ang pagdonar sang dugo bangud manami ang pamatyag, malayo sa masakit kag kaangay lang nga nakachange oil ang lawas.
