Ginpadayaw sang chairperson sa palaabuton nga Miss Bacolod Masskara 2022 nga ang pageant ang magahatag sang tatlo ka mga korona nga magahatag sang pwesto sa mga kandidata sa mga national pageants.
Suno kay Carlos Durana, nga anay nangin makeup artist kag hairstylist para sa mga kandidata sa Miss Universe Philippines, sa karun ang 15 nga mga kandidata nagikan sa 90 nga nagpascreening ang nagapaidalum na sa workshop sang Aces and Queens nga amo man ang masami nga nagapreparar sa mga kandidata sa ginapagtigayon nga mga national pageants kag madamo naman sila sang napadaog sa international crowns.
Kalakip sa ila workshop ang personality development, ang nagakaigo nga pagrampa, kag question and answer training kasubong man sa hair and makeup nga dako nga bulig para sa mga kandidata.
Gin-athag ni Durana nga luyag nila nga mangin pang-national level ang pageant gani ang anay Masskara Queen ang gin-islan nila sang Miss Bacolod Masskara title.
Dugang pa sini nga nakita sang Aces and Queens ang potensyal sang mga Bacolodnon nga sarang mahanas para sa national level.
Paathag ni Durana nga sila ang magahatag sang tatlo ka korona magluwas sa 1st kag 2nd placer, nga ginalakipan sang Miss Bacolod Masskara International, Miss Bacolod Masskara World kag Miss Bacolod Masskara Universe.
Ang mga nasambit nga title ang magahatag naman sang pwesto sa pagrepresentar sa Binibining Pilipinas, Miss World Philippines kag Miss Universe Philippines.
Paathag ni Durana nga luyag nila makahanas sang mga kandidata nga magluwas nga mga maanyag, maalam, makasarang man nga magpanindugan sang ila adbokasiya sa tion nga yara na sa national pageant.
Samtang ginpahayag naman sini nga subsidized man ang 15 ka mga kandidata kun sa diin ang Bacolod City Government ang nagpain sang P80,000 budget sa kada kandidata nga kabahin sang bulig ni Bacolod City Mayor Alfredo “Albee” Benetiz kag Congressman Greg Gasataya.
Pahayag sini nga sila ang may yara na sang pito ka mga judges nagikan sa national kaangay sang mga anay beauty queens sa nanarisari nga national pageants, apang nagaplano pa ang organisasyon nga himuon siyam ang hurado.
Ang 15 ka mga kandidata ang ginabug-usan sang edad 17 tubtob 25 anyos nga mga senior high school, college level kag may ara man sang nagatrabaho na.
Ginapanawagan naman ni Durana sa mga Bacolodnon nga suportahan ang mga kandidata agud nga ma-boost ang ila confidence, kag likawan ang mang-bash.
Ang pageant night ang patigayunon sa Oktobre 19 sa University of St La Salle – Bacolod coliseum.
