BACOLOD CITY — Nagkaon sang Pinoy food ang kandidata sang Miss Mauritius sa Miss Universe 2017 antes ang pormal sini nga pagsabak sa pageant preliminaries.
Si Miss Universe Mauritius Angie Callychurn ang nagbisita sa Miami, Florida sang nagligad nga semana bangud nagbisita ini sa balay sang Negrense international designer nga si Kirsten Regalado.
Si Regalado ang nagdesinyo sang national costume ni Miss Mauritius.
Ang costume ang nagapakita sang Sega queen.
Ang Sega isa ka kilala nga music kag saot sa pungsod Mauritius.
Sa interview sang Bombo Radyo, ginpahayag ni Regalado nga ginlibot niya si Callychurn sa Miami, kaupod ang direktor sini.
Gindala ni Regalado ang kandidata sa isa ka Pinoy restaurant sa Miami agud nga makatilaw sang mga luto diri sa Pilipinas.
Ini ang kaangay na gid lamang sang pinirito nga bangrus kag halo-halo bilang dessert nga nauyunan man sang lin-ay.
Nahisayran nga kilalahay si Regalado kag ang tag-iya sang restaurant rason nga nagaluto ini sang mga pagkaon nga makit-an diri sa Negros Occidental kaangay sang inasal nga manok.
Suno sa designer, mainabyanon si Miss Mauritius sa mga Pinoy kag nakita niya ang good heart sini.
Kumpyansa man ang designer nga mangin maayo ang performance ni Miss Mauritius sa pageant proper sang Miss Universe 2017.
