Natalana nga irepresent sang ginkoronahan bilang Miss Teen Masskara 2022 ang bilog nga Pilipinas sa Miss Teen Star Internation sa Thailand sa maabot nga Disyembre.
Suno kay Lyzabelle Blythe Siason Villa, 16 anyos kag Grade 11 student sa La Consolacion College (LCC) – Bacolod, nga halos indi man ini makapati nga siya ang nagdaog sa Miss Teen Masskara 2022 bangod ini ang una nga kahigayunan nga siya ang nagcompete sa pageantry.
Apang paathag niya nga sa iya pagpasakop sa kompetisyon, ginclaim na sini nga siya ang magadaog bangod wala sang kapuslanan kun siya ang maga-entra apang wala sang goal nga makoronahan.
Suno diri, ang Miss Teen Masskara 2022 ang ginabug-usan sang 10 ka kandidata nga babayi kag 10 man ang lalaki.
Pahanumdom sini nga sa pagdaog, isa sa pinakaliyabi amo ang pangamuyo kag pagpabilin nga humble.
Apang paathag ni Villa nga humalin pa lamang sang siya ang 11 anyos, nag-umpisa na ini sa modelling.
Tubtob sa ginhambalan ini sang iya nga handler nga siya ang may potensyal sa pageantry.
Suno diri, sadto paman huyog na sini ang magsuksok sang nagkalainlain nga panapton gani nagsulod ini sa modelling.
Si Villa ang 5-foot-5 sang siya ang 11 anyos samtang 5-foot-7 na karun nga siya ang 16 anyos.
Apang aminado man si Villa nga indi mahapos ang pagsaylo sa duha ka patag bangod sa modelling, sila ang nagatinir lamang sa pwesto kag dapat nakapoker face apang ang pageantry ang nagakinahanglan sang masami nga pagyuhom kag pagrampa.
Suno diri, wala nagaconflict sa iya nga pagtuon ang modelling apang sa karun, aminado man ini nga apektado ang iya pag-eskwela bangod kinahanglan sini magpractice bangod indi man sini luyag magcompete para sa pungsod nga indi preparado.
Isa man sa ginatrabaho sini ang iya nga pageant walk, apang wala pa ini sang pangalan sa iya nga sahi sang pagrampa.
Ginapasalamatan man sini ang pamunuan sang LCC nga siya ang ginhatagan sang duha ka semana nga allowance sa pagbalik sa Pilipinas matapos ang kompetisyon agud makacomply sa school requirements.
Sa pihak nga bahin, siya ang kabahin man sa Musa Pageant Camp nga amo ang nagahanas sa iya partikular na sa pageant walk.
Ang iloy sini nga si Atty. Belinda Siason, ang anay presidente sa Rotary Club Bacolod samtang si Lyzabelle ang Vice President sa karun sa Rotaract Club Bacolod nga para sa mga 18 anyos panubo ukon mga youth.
Diri man nagikan ang iya adbokasiya nahanungod sa edukasyon, bangod sa ila organization sila ang nagadonar man sang mga libro kag makita gid nila ang kalipay sang mga kabataan kasubong man ang kagustuhan nga makatuon.
Si Villa ang nagpadala naman sang sulat kay Bacolod City Mayor Alfredo “Albee” Benitez agud ipalab-ot ang nagahilapit nga kompetisyon bangod ini pa ini maka-atubang sang personal karun nga nakaquarantine ang alkalde tuga sang COVID-19.
