BACOLOD CITY — Ginadumdom gid sang candidate number 16 sa Binibining Pilipinas 2018 ang mga panugyan sa iya ni Miss Universe 2010 fourth runner-up Venus Raj sa pagsabak sa pageant.
Sa exclusive interview sang Bombo Radyo kay Annalita Vizcarra sang Barangay Cansilayan, Murcia, Negros Occidental, ginpahayag sini nga si Venus ang iya inspirasyon sa handom nga mangin isa ka beauty queen.
Ini bangud nga sang nagsugod siya sa pag-intra sa mga kompetisyon sa Murcia, si Venus ang nagtiglawas sa Pilipinas sa Miss Universe kag ginbalik ang rekord sang Pilipinas.
Sanday Vizcarra kag Venus ang magkaupod sa karon sa isa ka modeling company sa Manila kag sila ang nagkit-anay sang nagligad nga semana.
Ginpanugyanan ini sang Bicoleña beauty nga ipakita ang matuod nga pagkatawo sa pagsabak sa pageant, mangin confident, indi magpakulba kag masami nga magyuhom.
Suno kay Vizcarra, tandaan niya ang laygay ni Venus, sa paminsaron kag tagipusuon.
Wala naman ginpanginwala sang Murciahanon nga lin-ay nga handom niya nga makasulod sa Miss Universe.
