BACOLOD CITY-Natalana na nga pasakaan sang kaso subong nga adlaw ang bana nga nagpatay sa iya asawa gamit ang wasay sa ciudad sang Cadiz.
Suno sa hepe sang Cadiz City Police Station Chief Inspector Robert Mansueto, kaso nga parricide ang ipasaka batok sa suspetsado nga si Jose Hermalin, 70-anyos sang Brgy. Luna.
Mga ala-1:00 kahapon sang kaagahon sang nadakpan si Jose matapos ang pagpatay niya sa iya 64-anyos nga asawa nga si Violeta.
Sa imbestigasyon sang Cadiz City Police Station, nagakatulog si Violeta sang ini ang gin-wasay sang iya bana kun sa diin napilas ang naidalom sang iya baba nga nagderetso sa iya liog.
Ginatumod pa karun kun anu ang motibo sang bana sa pagpatay sini sa iya asawa.
Apang nagaguwa naman sa imbestigasyon nga may deperensiya sa paminsaron ang bana kun sa diin suno kay Mansueto nagaka-imbulbar man ini sa pila ka insidente sang pagpangkuha sang gamit sang ila mga kaingod apang wala na lang gina-report bangud gina-intiende na lang ini.
Isa man sa ginalantaw sang hepe nga rason sa pagpatay ni Jose sa iya asawa bangud nga gintaguan ini sang kwarta.
Nahibaluan nga isa man lang ka pilas ang naangkun sang biktima apang patal gid ini.
Suno kay Mansueto, hinulaman pa ang wasay nga gingamit sang suspek, kag matapos niya ginhimo ang krimen ginbalik man niya sa una sini nga nahamtangan sa tupad sang ila ginabis-akan sang kahoy.
Matapos ang krimen, nagpalagyo ang suspetsado apang nadakpan ini sang mga kapulisan bangud wala pa man ini nakapalayo gid sa ila barangay.
