Patay ang miyembro sang Epogon robbery group matapos gina-alegar nagbato sa mga otoridad nga nagserbe sang warrant of arrest sa iya sa Sitio Manluy-a, San Jose, Sipalay City nagligad nga Pebrero 20, alas-3:00 sang kaagahon.
Sa interview sang Bombo Radyo Bacolod kay P/Major James Latayon, hepe sang Sipalay City Police Station, ginpahayag sini nga joint operation ang ginpatigayon sang Regional Special Operations Group, Regional Intelligence Division, CIDG Negros Occidental, 604th company sang Regional Mobile Force Battalion 6 kag 15th Infantry Battalion sang Philippine Army batok kay Eddie Epogon, 22-anyos sang amo nga lugar.
Suno kay Latayon, si Epogon ang may warrant of arrest sa kaso nga robbery with homicide kag paghupot sang mga iligal nga armas kag granada.
Isa man ini sa apat ka mga suspek sa pagsulod sa balay kag pagpatay sa Belgian national nga si Carl Nolens sa Villa Angela Subdivision, Barangay Villamonte ciudad sang Bacolod sang Hunyo 17, 2020.
Suno sa hepe, nagdangat sa isa ka semana ang ila nga close monitoring kay Epogon antes natigayon ang operasyon.
Dugang pa ni Latayon nga sang nahibaluan sang suspetsado ang presensya sang mga otoridad, ginpagwa sini sa ila nga balay ang iya nga asawa kag iloy kag nagpalupok rason nga nagbalos ang mga operatiba.
‘Nakaangkon si Epogon sang isa ka igo sang bala sa iya nga ulo kag isa man ka igo sa dughan nga gintunaan sang iya kamatayon.
Nakuha man sa possession kag kontrol sini ang isa ka caliber .45 pistol ka granada.
