Ginalauman nga mapirmahan na sa masunod nga semana ang memorandum of agreement sa tunga sang Bacolod City Water District kag Murcia Water District para sa dugang nga water supply.
Sa interview sang Bombo Radyo kay BACIWA general manager Mona Dia Jardin, nabaton na sang water district ang draft sang kontrata nga ginreview sang Office of the Government Corporate Counsel.
Suno kay Jardin, ginakaayo na ang kaundan sang MOA santo sa rekomendasyon sang OGCC.
Bangud indi man tuman kabug-at ang mga rekomendasyon suno sa general manager, mahimo nga mapirmahan na ang MOA sa masunod nga semana.
Sa karon suno sa iya, 90 porsyento na ang proseso para sa dugang nga water supply nagikan sa MWD.
Si Jardin ang magahingyo sa Board of Directors sang gahum nga magpirma sa MOA samtang ang general manager sang MWD ang magahingyo man sang authority to sign nagikan sa ila nga board.
Kun mapirmahan na ang MOA, diri na magasugod ang pag-isip sang numero sang binulan agud nga matuman ang promisa sang MWD nga magdeliver sang 50 million liters per day sa BACIWA.
Suno kay Jardin, nagahimo naman sang paagi si BBWI agud nga madugangan ang supply sa Bacolod.
Suno kay Jardin, tinion lang ang kinahanglan agud nga magaimprove ang water supply.
Sa karon, 60 porsyento pa lang sang bilog nga Bacolod ang ginasuplayan sang BACIWA gani ginapaabot na nga dako pa nga volume sang tubig ang kinahanglan bangud 50MLD lang ang makuha sa MWD.
