Ginhangkat ni Monsignor Felix Pasquin sang Our Lady of Candles Parish ang mga Katoliko nga pakamahalon ang mga religious practices kaangay sang pag-obserbar sang All Saints Day kag All Souls Day bangud importante ini sa kabuhi sang isa kag isa kasubong man sa pagpakig-angot sa Ginoo.
Sa interview sang Bombo Radyo kay Monsignor Pasquin, ginpahayag sini nga una nga ginsaulog ang All Saints Day nga sadto ginatawag pa nga All Martyrs Day sang Mayo 13, 510 apang sang 9th Century, ini ang ginsaylo sa una nga adlaw sang Nobyembre.
Suno sa iya, sa bilog nga tuig may yara sang tagsa-tagsa ka mga kapiestahan ang mga santos apang kun Nobyembre 1 ini ang ginatingob.
Suno sa iya, ang mensahe sang All Saints Day amu ang pagpanghangkat sa mga Kristiyano nga magkabuhi sang balaan santo sa kabuhi ni Hesus Kristo.
Samtang ang All Souls Day naman suno diri amu ang pagdumdum sa mga minatay kag pagpangamuyo para sa mga kalag nga yara sa purgatoryo.
Suno sa iya, ang pagsindi sang kandila sa mga minatay ang nagasimbolo kay Hesu Kristo nga amu ang kapawa sang kalibutan.
Subong nga adlaw may misa nga patigayunon para sa mga santos samtang bwas, may yara man para sa mga minatay kun sa diin ginapahanugutan ang mga kaparian nga magpatigayon sang tanan ka mga misa.
