May mga pagpasalig na ang alkalde sa banwa sang Murcia angot sa isyu sa mabaho nga higko sang manok gikan sa Taala Farm, kasunod sang ginpatigayon nga special meeting kahapon.
Madumduman nga wala nadayun ang meeting kuntani sa Cansilayan Farm School kag naghulat lamang sang kapin tatlo ka oras ang mga pumuluyo, sa baylo ang close door meeting ang ginpatigayon sa sulod sang Municipal Hall.
Sa paathag ni Murcia Mayor Gerry Rojas, ginpili nila nga magpatigayon sang special session upod sa tag-iya sang Taala Farm, Provincial Environment and Natural Resources Office upod sa City kag Brgy Council sang Brgy Cansilayan, kag yara man ang principal sang Cansilayan National High School nga isa man sa nagareklamo.
Suno sa alkalde, wala sang mahuman nga konkreto nga solusyon kun sila ang tuman ka damo kag mapuno lamang sang opinyon ang meeting.
Paathag sini nga ang mga Barangay Officials amo na ang nagserbe nga representative sang mga pumuluyo samtang isa sa mga bata ni Mr Taala naman ang nagtambong.
Suno kay Mayor Gerry, gina-ako ni Mr Taala ang kapaltahan kag ginalantaw nga may-ara sang lapses sa bahin sang management.
Pahayag sang alkalde nga may mga napahalin na si Mr Taala nga mga tawo nakaligad nga tinuig matapos matukiban nga wala nagasunod sa proseso sa paghandle sang higko.Agud maseguro nga nagakasunod ang proseso, ginpasalig sang mga ini nga isa sa bata ni Mr. Taala ang personal nga magamonitor sa operasyon.
Doblehon man nila ang ginaspray nga enzyme agud madula ang baho sang mga iti sa pagconvert bilang organic fertilizer.
Nakaligad nga duha ka semana, ginsuguran naman sang Taala Farm ang pagtinlo sa kontaminado nga sapa.
Aminado si Rojas nga indi overnight masolbar ang problema, apang pasalig sini nga amat-amat nga mabatyagan ang improvement.
Magluwas diri, si Punong Barangay Edgar Daquipil ang nagpahayag man nga magatukod sang task force nga magaserbe nga sanitary inspector.
Pasalig ni Mayor Gerry nga siya mismo ang magakadto man sa Taala Farm agud makaseguro nga ginahitso na ang procedural lapses.
Sa pihak sini, ginbuksan man sang bata nga Taala nga sila ang nagahinun-anon na sa Malaysian contractor sa pagtukod sang isa ka bodega.
Sa nasambitan nga bodega na patigayunon ang tanan nga procedure tuhoy sa pagconvert sang iti agud mangin organic fertilizer, nga makabulig man agud indi na magsungaw sa gwa ang baho.
