Nagdangat sa masobra 90 ka indibidwal ang gin-evacuate sa ciudad sang La Carlota matapos ang liwat nga paglupok sang bulkan Kanlaon alas- 4:38 kahapon sang hapon.
Sa interview sang Bombo Radyo kay Angie Gelongo, head sang La Carlota City Social Welfare and Development Office, 30 ka pamilya ukon 93 ka indibidwal gikan sa Barangay Ara-al ang temporaryo nga nagtinir sa La Carlota South Elementary School 1.
Suno diri, sang naglupok ang bulkan gilayon nga gin-evacuate ang mga pumuluyo kag gindala sa Barangay hall kun sa diin sila gin-amat amat kuha kag ginbyahe padulong sa evacuation center.
Suno kay Gelongo ang mga gin-evacuate amo man ang mga residente sadto nga gin-evcuate sang naglupok ang bulkan sang Disyembre 9, 2024.
Gin-assess ang mga evacuees kag ginhatagan sang hot meals, tag-isa ka gallon sang tubig kada pamilya, folding bed, ulonon, habol, kag hygiene kits.
Pahayag sini, indi pa mahambal kun tubtob san-o matinir ang mga evacuees sa evacuation center apang ginalauman sini nga indi na maglawig antes sila makapauli sa ila tagsa ka puluy-an.
