Ginpadangat sang General Alliance of Worker’s Association (GAWA) sa atensyon sang Western Visayas Regional Tripartite Wages and Productivity Board (RTWPB) ang ila concern tuhoy sa presensya sang mga Chinese workers sa rehiyon.
Sa interview sang Bombo Radyo Bacolod kay GAWA secretary-general Wennie Sancho, maka-alarma ang nasambit nga issue ilabi na nga may yara sang pila ka mga alegasyon nga may yara sang mga Chinese workers nga nagatrabaho sa mga powerplants sa Western Visayas.
Sa ila pagsinapol sang nagligad nga Abril 11, ila nahambalan nga magapadala sila sang sulat sa Bureau of Immigration-Region 6 agud mahibaluan kun may yara sila nga gin-issue nga special working permits sa mga Chinese workers.
Nagakahangawa man si Sancho sa pagdamo sang mga Chinese workers sa rehiyon bangud suno diri may yara sang kapin 181 mil ka mga unemployed workers karon sa Western Visayas nga dapat mahatagan sang trabaho.
Plano man sang RTWPB nga ipalab-ot ang nasambit nga isyu sa Department of Labor and Employment (DOLE).
