Malipayon nga ginshare sang mga manunudlo sa Ramon Torres Malingin National High School sa Department of Education (DepEd) division of Bago City ang ginpatigayon nga selebrasyon sang labing una nga anibersaryo sang nagaisahanon nga Farm School sa nasambit nga DepEd Division sang Oktobre 21.
Suno kay Michelle Romero, nakaligad nga tuig sang ginbuksan sang Regional Director sa DepEd ang farm school nga sa karun ginapatigayon sa Grade 7 kag 8.
Pahayag sang manunudlo nga ila ginahanas ang mga estudyante agud mangin maayo nga agriculturist sa palaabuton.
Paathag ni Romero nga dako nga benepisyo para sa mga pumuluyo kag kabataan sa Barangay Malingin, Bago City ang farm school ilabi na nga kalabanan man sa mga ginikanan sang mga estudyante ang mga mangunguma.
Suno diri, pinaagi sini lamharon pa lamang mapahangop na sa mga kabataan ang importansya sang agrikultura, bangod kun wala ini wala man sang supply sang pagkaon ang mga pumuluyo.
Maluwas sa Farm School sa Grade 7 kag 8, ang buluthuan ang naga-offer man sang strand sa Senior High School nga Agricultural Crops.
Pinaagi sa pagtudlo sa mga kabataan, ginalantaw man sang manunudlo nga ma-encourage pa ang mga ginikanan nga indi pag pabay-an ang agrikultura nga tuman ka importante sa bilog nga Pilipinas.
Natalana naman ang mga ini nga magbukas sang hydrophonics sa nursery sang buluthuan kag target sang mga ini nga makaproduce sang lettuce.
Nagadevelop man sang tagsa ka mga garden ang mga manunudlo kag tinutuyo sang mga ini nga mamintinar ang feeding program sa eskwelahan.
Samtang gin-athag naman sang manunudlo nga si John Errol Nidal nga ang buluthuan amo ang labing una nga farm school sa Bago City Division, apang may-ara na sang 26 ka iban pa nga farm school sa bug-os nga Region 6.
Ini ang gintukod sa idalum sang Republic Act 10618 ukon ang Rural Farm School Act.
Paathag sang TLE Teacher nga makabig na nga milestone para sa ila ang isa ka tuig nga pagpatigayon sang programa apisar sa kakulang sang facilities kag resources.
Suno kay Nidal, naghulam lang sila sang duha ka buluthuan gikan sa Grade 7 kag Grade 8.
Ginpasalamatan man sang manunudlo ang suporta nga nabatun gikan sa Department of Agriculture (DA) sa Bago City, Philippine Rice Research Institute (PhilRice) Negros Occidental kag Bago City Government.
Ginapabugal man ni Nidal ang ila nga Water Filtration nga ginhingadlan “Paawasan”, nga amo ang nagdaog sa District Innovation; Calamansi Plantation; Rosal Plantation; Fish Pond, nga nagaproduce na sang tilapia kag Taiwan; Demo Farm, ang 2 hectare nga humayan nga isa ka income generating project.
Sa duha ka adlaw nga Farm School Day, ginpahayag sang isa pa ka manunudlo nga si Christy Mancesa, nga sila ang nagpatigayon sang pila ka mga aktibidad kalakip na ang parada sang karosa, cooking contest, flower arrangements kag ang Baligyaan sa Utanan.
Nangin dinapit nga bisita sa aktibidad si Dr Allan Yap, ang superintendent sa DepEd division of Bago City, katapo sang DA nga nagpatigayon sang seminar sa mga estudyante kag manunudlo, kag pila ka mga konsehal sang syudad nga nagasuporta sa programa.
Ginakalipay man ni Mancesa nga nakita nga dako nga pagsuporta sang mga ginikanan sa farm school bangod sa paghuman sang plot area para sa demo-farm, nga amo ang pinakamabudlay nga trabaho, madamo man sang ginikanan ang nagbulig.
Sa pihak nga bahin, ginpahayag man sini nga ang mga nagagradwar sa Agri-Crop Production nga strand sa Senior High School ang makabatun na sang National Competency (NC) II Certificate sa Technical Education And Skills Development Authority (TESDA).
Ginatinguhaan sang mga ini nga mahatagan man sang NC II sa tion nga mapatigayon na ang Farm School tubtob sa Grade 10 Junior High School.
