Nagaka-agnas na sang masapwan ang bangkay sang isa ka lalaki sa kakampuhan sa Hacienda Carmenchica, Barangay DSB sa banwa sang Pontevedra alas-10:35 kaina sang aga.
Sa interview sang Bombo Radyo Bacolod kay Lito Robles, tatlo tubtob apat ka adlaw na sini nagakapanimahuan ang naga-alisngaw nga baho sa lugar.
Siya ang adlaw-adlaw nga nagalabay sa dalan bangod ini ang alagyan niya padulong sa trabaho.
Apang kaina, ang bangkay ang nasapwan sang manug-abono sa kampo.
Bangod sa naga-alisngaw nga baho, ginpangita sini ang ginhalinan kag didto nasapwan ang bangkay sang lalaki nga nagahapaon kag wala sang panapton kapin tatlo tubtob lima ka metros gikan sa highway.
Sa pihak nga bahin, tubtob sa karun padayun pa nga ginatumod sang Pontevedra Municipal Police Station ang identity sang bangkay.
Sa interview sang Bombo Radyo Bacolod kay Police Captain Darryl Kuhutan, wala sang nakita nga sign of struggle sa area bangod mahipod man ang mga tubo.
Nagrequest naman ang mga ini sang post mortem examination sa Scene of the Crime Operation agud matumod ang rasun sang kamatayon sini.
Bangod wala man sang nakita nga samad tuga sang pagpangluthang ukon pagpamuno, isa sa ginalantaw ni kuhutan nga may deperensya sa paminsaron ang biktima, nagsulod sa kampo, nagutman, nalipungan, tubtob sa nadulaan sang kabuhi.
Apang ginalantaw man nila ang iban pa nga sarang mangin anggulo.
Panawagan naman sini sa mga may himata nga apat ka adlaw pasaka na nga wala makapauli nga makig-angot sa ila agud makabulig sa pag-identify sang bangkay.
