Temporaryo nga nagtinir sa tatlo ka evacuation center sa banwa sang Toboso ang mga evacuees nga apektado sa nagluntad nga engkwentro sa tunga sang 79th Infantry Battalion sang Philippine Army kag New People’s Army (NPA).
168 tanan ka pamilya ukon 653 ka indibidwal ang gin-evacuate kun sa diin may yara sang 85 ka pamilya ukon 303 ka indibidwal ang nagtinir sa Salamanca Elem. School kag anum ka pamilya ukon 24 ka indibidwal sa Toril Elementary school sa barangay Salamanca samtang may 77 ka pamilya ukon 326 ka indibidwal naman ang yara sa Labi-labi Elementary School sa barangay San Jose.
Sa interview sang Bombo Radyo kay Municipal Social Welfare and Development Office (MSWDO) head Peggy Gimena, kagab-i nagpadulong ang mga evacuees sa evacuation center nga gilayon gindapadal-an sang pagkaon.
Iban naka-abot sang timprano samtang iban naman nadugayan bangod wala na nakaggwa pa samtang nagapadayon ang engkwentro.
Suno diri, halos tanan nga evacuees wala nakapreparar amo nga pipila lang ang ila nadala nga gamit padulong sa evacuation center.
Pahayag ni Gimena, kun maliwat ang kaangay nga insidente, dapat magsunod ang mga pumuluyo kun maghambal nga mag-evacuate na kag indi na paghulaton nga may matabo pa ukon indi na makaggwa sa area bangod delikado na ang sitwasyon.
