Arestado ang nagapakilala nga Civil Engineer sa ginpatigayon nga drug buybust operation sang Bacolod City Drug Enforcement Unit sa isa ka hotel sa Goldenfield commercial complex, Barangay Singcang Airport, sa ciudad sang Bacolod pasado alas-6:00 kahapon sang aga, Enero 21, 2025.
Ginkilala ang mga nadakpan nga sanday alias Fredo, isa ka engineer – 51 anyos, alias Iya – 18 anyos, lunsay mga residente Barangay Mansilingan kag alias Shaba – 23 anyos, residente sang Barangay Singcang Airport.
Narecover sa tatlo ang tatlo ka bulto kag onse ka plastic sachets sang suspected shabu nga ginabanta nagabug-at sang 250 ka gramos.
Ang narecover nga suspected shabu ang nagabalor sang P1.7 million.
Sa interview sang Bombo Radyo Bacolod kay Bacolod City Drug Enforcement Unit Head Police Lt Col. Antonio Benitez, ang mandato sang City Director sang Bacolod City Police Office nga lagson ang mga high value individual nga nagapasulod sang illegal nga druga sa ciudad sang Bacolod.
Suno kay Benitez, kalabanan sang mga high value indibidual ang ila na nadakpan kag nakahunong naman sa police stations sa ciudad sang Bacolod.
Suno diri, ang macategorized naman nga masunod nga HVI amo ang mga mahimo magasalo sang supply sang ilegal nga droga.
Panugyan ni Benitez nga magpaminsar gid antes magpati sang mga transaction nga ginaduso sa mga ini.
