May yara na sang ginasuspetsuhan ang Barangay Officials kun sin-o ang nagbilin sang bag-ong bun-ag nga lapsag nga lalaki sa idalom sang isa ka balay sa Purok Kawayanan, Barangay Cabug, Bacolod City sang Marso 14 sang gab-i.
Sa interview sang Bombo Radyo kay Rene Trenuela, manyapon na ini kuntani sang may nabatian ang iya asawa nga nagahibi nga bata.
Ginpinsar pa sini nga video lamang sa Youtube nga ginalantaw sang mga bata ang nagakabatian, tubtob nga naghambal ang iya asawa nga may nagahibi sa idalom sang balay.
Sang gintsekyar, nakita nila nga preska pa ang dugo sa wala sang putos nga lapsag kag naga-angot pa ang umbilical cord.
Suno diri ginsubayan na ang lapsag gani gilayon sila nga nagtawag sang Barangay, kag nagpadala sang ambulansya agud madala sa ospital ang baby.
Sa karun ang lapsag ang yara na sa maayo nga kondisyon.
Ginapangita man sa karun sang mga kapulisan kag sang Barangay Officials kun sin-o ang nagbilin sang lapsag.
Sa interview sang Bombo Radyo Bacolod kay Police Staff Sergeant Charmie Jimenez, Women’s and Children Protection Desk (WCPD) Investigator sang Bacolod Police Station 9, padayon pa ang ila nga imbestigasyon apang ginapahayag sang Barangay Kagawad sa lugar may yara na ini sang ginasuspetsuhan nga mahimo nagbilin sang lapsag.
