Indi kumporme ang isa sa mga tagreklamo sa nangin pamatbat sang Sangguniang Panlalawigan kay Calatrava Mayor Marilyn Era angot sa ginpasaka nila nga kaso bangud sa pag-terminate sang ila serbisyo bilang consultant sa Calatrava Municipal Hospital.
Suno kay Dr. Lewyn Torres, indi ini satisfied sa nangin desisyon sang Provincial Board sa pihak nga ginpamatbatan nga guilty si Mayor Era sa reklamo nga Grave Abuse of Authority kag Gross Negligence of Duty nga ginpasaka nila ni Dr. Kristine Ureta.
Sa Nobyembre 26 nga desisyon sang Sangguniang Panlalawigan, sa baylo sang duha ka bulan nga suspension sang alkalde, igahatag na lamang ang sweldo sini sa amo nga mga binulan sa nagreklamo nga mga doctor.
Suno kay Dr. Torres, indi maayo para sa iya ang gindagdag nga penalidad bangud nagalaum sila nga i-suspend ang alkalde.
Nagapanindugan ang mga ini nga indi sila magbaton sang kwarta gikan sa duha ka bulan nga sweldo ni Mayor Era.
Sa baylo, plano sang mga ini nga ipasaka sa Office of the Ombudsman ang kaso apang ila pa ini igakonsulta sa ila nga mga abogado.
Nag-ugat ang kaso sang magreklamo si Torres angot sa shareable amount gikan sa PhilHealth.
Ang pagreklamo sang doctor ang natabo sang una nga semana sang Mayo kag pagkaligad sang duha ka semana, ginpahibalo na lamang sila sang Chief-of-Hospital nga si Dr. Elien Lumanog nga indi na sila paghatagan sang schedule rotation sa bulan sang Hunyo sa pihak nga sa Hunyo 30 pa matapos ang ila kontrata.
