Nagtumbo tumbo sa kalipay ang 83-anyos nga biyuda sa syudad sang Bacolod matapos nga mapilian bilang tagdaug sang grand prize sa grand draw sang One Two Panalo Part 19 Promo sang Bombo Radyo kag Star FM.
Kadungan sang live draw, si Alicia Caba sang Purok Magbinuligay, Barangay Bata, Bacolod City ang nagpangamuyo nga ini ang magadaug bisan guaranteed prize lang kahapon.
Sang wala napilian ang iya entriesa sa guaranteed prize, nagpangamuyo ini liwat nga mapilian bilang regional prize winner ukon grand prize winner.
Gani tuman ang kalipay kag pagpasalamat sini sang siya ang napilian bilang ika-72 na milyonaryo sa mga promo sang Bombo Radyo.
Suno kay Nanay Alicia, ang kwarta nga iya nadag-an ang ibakal niya sang balay kag maintenance nga bulong bangud siya ang nagasuprer sang diabetes kag hypertension.
Si Nanay Alicia ang nabiyuda sadtong tuig 1981 kag may lima ka mga kabataan.
Ang bana sini ang nagtaliwan bangud sa sakit sa baga.
Suno kay Caba, pangamuyo lang gid kag maukod nga paghulog sang entries ang iya nangin sekreto kun ngaa siya ang nagpangibabaw sa tanan nga promo participants.
Tigulang na kag madamo sang ginabatyag sa lawas si Caba apang siya man gihapon ang nagaatipan sang iya isa ka anak nga may balatian man sa lawas.
Ang tatlo sa iya iban pa nga kabataan ang wala man nagatinir sa Bacolod.
Ginpahayag man sini nga masami nga perwisyo sa ila sang iya anak ang nagatinulo nga bubong sang balay.
Ginabuligan man siya sang iya anak nga nagatrabaho sa gas station sa Manila kag nagadealer man ini sang cosmetic products kag RTWs.
Ginpahayag man sini nga sang nagaduging pa ang pandemya sa syudad ginbudlayan man ini bangud madamo sang wala nagbayad sa iya sang ginpangkuha nga cosmetics kag RTWs.
Samtang, si Nanay Alicia ang nagdaug man sa daily draw sang promo sa week number 2 kag week number 4 gani naghulog siya sang madamo nga entries agud may chansa nga makadaug sang mas dako nga premyo sa grand draw.
