Ginpanindugan sang mga himata sang community researcher nga si Errol Wendel nga sala nga bangkay ang ginpadala sa ila matapos ang engkwentro sa banwa sang Toboso, Negros Occidental sang Abril 19.
Base sa autopsy nga ginpatigayon ni forensic pathologist Dr. Raquel Fortun sa lima sa mga napatay, nagwa ang resulta nga indi kay Wendel ang bangkay nga gindala sa Manila.
Suno kay Fortun, wala nagasanto ang kataason, itsura, kag iban pa nga detalye sang lawas kay Wendel.
Naggwa man sa eksaminasyon nga pila sa mga biktima ang nakaagom sang pila ka mga igo sang bala, kalakip ang mga igo sa ulo kag likod.
Isa man ka babayi nga ginbawian sang kabuhi sa insidente ang ginapatihan napatay bangud sa blood loss matapos maiguan sa tiil.
Madumduman nga ginkumpirmar na sang militar nga tanan nga napatay sa engkwentro ang katapo sang New People’s Army apang suno sa mga himata, sibilyan lamang ang mga ini kag naulamid lang sa engkwentro.
Samtang, ginpahayag naman sang National Union of Peoples’ Lawyers ukon NUPL nga wala ginsunod ang insakto nga proseso sa pagkilala sa mga bangkay.
Tubtob sa karon, wala pa sang opisyal nga pahayag ang Armed Forces of the Philippines samtang ginahulat pa ang press conference sang 3rd Infantry Division.
