Natumod na ang initial identity sang napatay nga remnants sang New People’s Army sa engkwentro batok sa militar sa Sitio Apitong, Barangay Bi-ao, Binalbagan, Negros Occidental kaina alas-2:15 sang kaagahon.
Sa interview sang Bombo Radyo Bacolod kay Punong Barangay Junefel Aguillon, nasugata lamang sang mga katapo sang 94th Infantry Battalion ang ginabanta lima ka rebelde nga lunsay mga lalaki.
Suno diri, ang pagbayluhanay sang lupok ang nag-umpisa alas-2:15 kag natapos alas-2:48 sang kaagahon.
Ang napatay ang ginkilala nga si Regie Pacheco alyas Dante, residente sang Brgy Buenavista, Himamaylan City.
Suno sa Punong Barangay, ang militar ang may mga litrato sang mga NPA members, nga ila ginbasihan sa pagtumod sa iya identity.
Si Pacheco ang nagahapaon sang napatay sa tunga sang Brgy Road, kag yara sa tupad sini ang M16 rifle.
May naga-angot naman nga rifle grenade sa iya bandolier.
Gani wala gilayon natandog sang Scene of the Crime Operation ang bangkay, bangod ginahulat pa ang Explosive Ordnance and Disposal Unit sang Philippine Army nga naka-abot pasado alas-2:00 sang hapon.
Luwas sa napatay, may isa pa ka NPA member nga ginapahayag nasamaran kag nagpalagyo sa kakampuhan.
Ang engkwentro ang kapin 200 metros gikan sa anom ka balay, kag ang mga lupok ang nabatian man sa Barangay Hall apisar nga tatlo ka metros ang kalayuon sa encounter site.
Wala na sang may gin-evacuate bangod ang mga rebelde ang nagpalagyo sa maligwin nga mga lugar palayo sa mga pamalay.
Samtang nagapull-out ang Scene of the Crime Operation sa encounter site, liwat nga may nabatian nga mga paglinupok.
