Nagdangat na sa 68,875 ang kabug-usan nga numero sang mga nagkalamatay sa Gaza humalin sang nagsugod ang gyera sa tunga sang Israel kag Hamas sang Oktubre 7, 2023 suno sa mga local authorities.
Kadungan sini, nagadangat naman sa 170,679 ang numero sang napilasan.
Sa ulihi nga data, tatlo ka mga bangkay kag duha ka mga pilason ang nadala sa ospital sa sulod lamang sang 24 oras, rason kun ngaa nagsaka sa 241 ang numero sang mga nagkalamatay kag 609 naman ang pilason humalin sang ginpatuman ang ceasefire sang Oktubre 10, 2025.
Magluwas diri, 513 ka mga bangkay man ang narecover nagikan sa nagcollapse nga mga buildings.
Suno sa mga otoridad, 15 ka dugang nga mga bangkay sang Palestinians ang ginbalik sang Israel sa bulig sang Red Cross, kun sa diin kabug-usan nga 285 ka mga bangkay na ang nabalik sang Israel humalin sang ginpatuman ang ceasefire.
Sa nasambit nga numero, 84 pa lamang ang na-identify sang medical team.
