Duha na ang napatay sa nagluntad nga pagbunggo-anay sang hauler truck kag pickup truck sa Hacienda Tibay Lopez, Barangay Efegenio Lizares, ciudad sang Talisay, Negros Occidental.
Madumduman nga wasak ang unahan nga bahin sang hauler truck samtang nagtakilid naman ang pickup truck bangud sa impact sang aksidente.
Sa interview sang Bombo Radyo Bacolod kay Police Major Rhazil Jim Jocson, Deputy Chief of Police sang Talisay City Police Station, nakumpirmar nila nga duha ang napatay sa aksidente kun sa diin ang isa ang dead on arrival nga ginkilala kay Ronjon Caballero, isa sa mga nakasakay sa pick-up samtang napatay man kahapon sang kaagahon ang driver sang pick-up nga ginkilala kay Nilo Espanto.
Suno kay Jocson, ang isa pa ka sakay sang pick up nga si Paul Simon Puertillano, residente sang San Carlos City ang padayon pa nga ginabulong sa ospital samtang ang driver sang hauler truck nga ginkilala nga si Galy Antipatia, 50 anyos, Purok Sampaguita, Brgy Paraiso, Sagay City ang nagapaayo man sa ospital.
Wala pa nakaestoryahanay ang magtimbang nga bahin kun ang mga ini ang magapasaka sang kaso apang ginapreparar sang mga kapulisan ang nagakaigo nga dokyumento para sa filing.
Ang hauler truck ang nahibaluan nga nagabyahe padulong sa ciudad sang Bacolod kun sa diin nag-overtake ini sa isa ka wingvan apang nasugata sini ang Ford Raptor gani natabo ang aksidente.
Bangod sa makusog nga collision, nagbalabag sa dalan ang hauler truck samtang nagtakilid naman ang pickup truck.
