Ginpahanumdom sang National Police Commission – Negros Island Region (NAPOLCOM NIR) sa mga kapulisan nga pasanyogon ang relasyon sa pamilya.
Nag-trending sa social media ang CTTV footage kun sa diin gintapungol, tampuyong kag kuga sang isa ka pulis sang Malolos City Police Station ang iya asawa.
Nag-away ang duha kun sa diin una nga gintampa sang asawa ang pulis kag nagbalos ang bana.
Ginsumbag sang pulis ang iya asawa amo nga natumba ini.
Ginsirad-an sang pulis ang puertahan kag nagbalik pungko sa bangko samtang nagakuti sa iya cellphone samtang nagahapa sa salog ang babayi.
Nagbangon ang asawa kag gintuyo sini nga agawon ang cellphone sang bana niya apang liwat naman sila nga nag-away kag may natabo nga sakitanay.
Sa karun ginkakas na sa pwesto ang pulis kag ginbawi ang iya service firearms kag ID.
Sa interview sang Bombo Radyo kay Atty Owen De Luna, director sang NAPOLCOM NIR, dapat ikonsiderar kun paano ginadala ang isa ka relasyon bangod kun kaisa naga-apekto man ang trabaho sang pulis sa iya pagpangabuhi.
Suno diri, mas maayo kun may manami nga komunikasyon sa pamilya kag indi pagamiton ang bayolente nga pamaagi.
Dugang pa sini, indi man maghimo sang butang nga hinulsolan sa ulihi.
Samtang, padayon ang ila pagmonitor sa mga nabaton nga complaints sa Women and Children Protection Desk (WCPD) kag nagpanugyan nga indi mahadlok sa pagreklamo.
