Nakarekord ang Department of Health (DOH) sang kabug-osan nga 28 ka kaso sang mga nasamaran bangod sa palupok sa bug-os nga pungsod sa adlaw sang Paskwa.
Sa advisory nga ginpagwa kahapon sang Disyembre 25, ginpahayag sang DOH nga may walo ka bag-o nga kaso nga narekord halin sang Disyembre 21 tubtob Disyembre 25.
Suno sa datos, 68 porsiyento sang mga biktima ang naga-edad 19-anyos paubos.
Kalabanan sang mga nalupokan ang nagikan sa boga, 5-star kag triangle.
Ginpanawagan sang DOH ang publiko nga dal-on dgilayonsa ospital ang mga biktima nga nalupokan kag magtawag sa National Emergency Hotline nga 911 para sa madasig nga bulig medikal.
Apang, ginpahayag sang ahensiya nga mas nubo sa gihapon sang 50 porsiyento ang kadamuon sang mga kaso kumpara sa 58 ka firecracker-related injuries nga narekord sang nakaligad nga tuig sa pareho nga adlaw.
Ang datos ang nagikan sa 62 ka sentinel hospitals nga ginabantayan sang DOH.
Samtang, magapadayon ang holiday monitoring sang DOH tubtob Enero 5, 2026, upod ang panawagan nga likawan ang paggamit sang paputok para sa mas luwas nga pagselebrar sang Bag-ong Tuig.
