Ginkumpirmar sang kapulisan nga ido kag indi lapsag ang nasapwan nga bangkay sa Reclamation Area sa Palanca Street, Brgy 12, Bacolod City kapin alas-8:00 kaina sang aga.
Nahibaluan nga isa ka bata nga babayi ang nakakita sang bangkay nga yara na sa advance stage of decomposition.
Suno diri, tatlo ka adlaw na nga nagapanimaho sa lugar, kag kagab-i ini ang ginabalikbalikan sang ila nga ido.
Gani kaina sang aga ila ini nga gintsekyar kag sang gin-ukay, didto na nila nakita ang gina-alegar kamot kag ribs nga may-ara pa sang nabilin nga unod.
May-ara man sang panapton nga pangbaby kag diaper ang bangkay.
Apang sa pag-usisa sang Bacolod Police Station 1, natumod nga iya sang ido ang nasapwan nga bangkay.
Sa interview sang Bombo Radyo Bacolod kay Police Captain Efren Legada, officer in charge sang Bacolod Police Station 1, may mga bahin pa sang lawas nga may balahibo nga brown.
Ginalantaw sini nga mahimo nasal-an lang sang nakakita nga bangkay sang lapsag ang nakita bangod may panapton sang bata kag may-ara sang diaper.
Ini bangod may mga agalon nga ginapabayuan sang bayo sang baby ang ila mga hinuptan kag ginapasuksok man sang diaper.
Ang bangkay ang nasulod sa karton sang nakita sa kilid sang dalan, malapit sa kun diin nakita sadto ang bangkay ni Freya Mae Go.
Suno kay Legada, ginclose na nila ang imbestigasyon bangod nakumpirmar naman sang Scene of the Crime Operation (SOCO) nga ini ang iya sang sapat.
