Naghingyo ang grupo sang mga manunudlo sa ciudad sang Bacolod nga pasakaan sang national government ang sweldo sang mga maestra kag maestro.
Suno kay Richard Gelangre, presidente sang Bacolod City Public School Teachers Federation, ila ginaduso nga pasakaan ang sweldo nagikan sa Salary Grade 11 pasaka sa Salary Grade 15.
Suno diri, P25,000 ang net income sang Teacher 1 subong apang bangud sa deduction nga buwis kag premium, P18,000 nalang ang ila nga take home pay.
Kun may yara naman sang loans, P5,000 nalang ang kalabanan nga take home pay sang mga manunudlo.
Suno sa IBON Foundation, P33,000 ang income sang isa ka empleyado agud nga indi ini makabig nga pigado.
Suno kay Gelangre, madamo ang loan sang isa ka manunudlo bangud kulang ang income sini.
Ginpromisa man sadto ni anay Presidente Rodrigo Duterte nga sakaan sang P10,000 ang sweldo sang mga manunudlo apang P5,000 lang ang nagtupa kag P1,400 ang katapusan nga tranche sa masunod nga tuig.
Suno kay Gelangre, nagalaom sila nga malakip ang saka sa sweldo sa 2023 national budget.
Tinalikdan nga adlaw suno sa iya, ginpahayag ni DepEd spokesperson Michael Poa nga wala sang lauman nga salary increase ang mga manunudlo.
Suno diri, indi mahimo nga wala sang saka sa sweldo bangud nagasaka nga nagasaka ang presyo sang nagapanguna nga mga balaklon.
Nagalaom man ang grupo sang mga manunudlo nga mahatagan sang pagtamod ang sweldo sang private school teachers bangud tuman gid ini kagamay.
Suno kay Richard Gelangre, presidente sang Bacolod City Public School Teachers Federation, dako ang bulig sang pribado nga mga eskwelahan agud mabuhinan ang kadamuon sang mga estudyante sa pampubliko nga mga buluthuan.
Sa karun suno kay Gelangre, nalipay ang mga manunudlo nga diutay ang mga estudyante sa sulod sang classroom bangud indi pa full-blown ang face-to-face classes.
Apang kun magbalik ang full-blown face-to-face classes sa bulan sang Nobyembre, 300 na ang kabug-usan nga estudyante sang isa ka manunudlo sa sulod sang isa ka adlaw.
Nagademand man ang mga ini nga madugangan ang budget sang pungsod agud mapaaayo ang kalidad sang edukasyon.
Suno diri, naga-exodus ang mga manunudlo padulong sa Thailand bangud P50,000 tubtub P70,000 ang sweldo didto kun ikumparar sa Pilipinas nga P25,000 ang entry level.
Suno diri, human resource ang ginaproduce sang mga manunudlo gani dapat buligan ang mga ini paagi sa husto nga sweldo kag maligwa nga classroom.
Suno kay Gelangre, nagdamo pa gid ang mga estudyante pagkatapos sang duha ka tuig nga COVID pandemic gani kinahanglan sang dugang nga classrooms kag dugang nga manunudlo.
