BACOLOD CITY — Masobra 50 ka mga atleta, coaches kag trainers ang nagpangayo sang atensyon medikal sa una nga inadlaw sang pagtinir sa ciudad sang Iloilo para sa Western Visayas Regional Athletic Association ukon WVRAA Meet 2018.
Suno kay Joey Ian Singson, in-charge sang medic team sang Negros Occidental sa La Paz Elementary School, kalabanan nga ginabatyag sang mga pasyente amo ang loose bowel movement.
Mahimo suno kay Singson nga naglain ang tiyan sang mga natungdan matapos nga nag-inom sang tubig kag nagkaon sa gwa sang eskwelahan.
Ini bangud ginasigurado sang food committee suno sa iya nga matinlo ang ginaserbe sa delegasyon sa canteen sang eskwelahan.
Ikaduha nga ginabatyag sang mga ini ang amo hyper-acidity.
Bangud sini, nagaupod ang WVRAA suno kay Singson sa panawagan sang Department of Education nga indi mag-inom sang colored drinks, juices, iced tea kag softdrinks agud indi magbatyag sang hyper-acidity.
Ang iban naman nga pasyente ang nagabatyag sang allergy.
Sa pihak sini, ginpasalig ni Singson sa mga ginikanan nga nabilin sa Negros Occidental nga ginabantayan nila sang husto ang ikaayong-lawas sang mga atleta sang probinsya nga nagapasakop sa WVRAA Meet.