Patay ang lalaki nga negosyante matapos gintiro sa sulod sang iya salakyan sa Brgy. Villamonte, Bacolod City, Negros Occidental, kahapon, alas- 5:20 sang hapon.
Sa interview sang Bombo Radyo Bacolod kay Police Capt. Francis Depasucat, station commander sang Bacolod City Police Station 4, ang biktima nga si Jun Alaba, yara sa legal nga edad, residente sang Brgy Estefania, ciudad sang Bacolod ang nagamaneho sang maroon nga Isuzu MUX kaupod ang iya nga bodyguard nga si Ronel Rafael, 34 anyos, single, kag residente sang banwa sang Toboso.
Suno diri, bag-o gid lamang nag-withdarw sang kwarta si Alaba kag samtang nagabyahe, may nagluntad nga argyumento sa tunga nila sang iya bodyguard.
Sa panaysayon ni Rafael, bukas ang bintana sang salakyan kag may persona nga nagasakay sa motorsiklo nga nagtiro sa biktima kag naigo sa natuo nga bahin sang tiyan si Alaba.
Suno kay Rafael, ginbalusan pa niya sang tiro ang suspetsado sa gwa sang salakyan.
Apang, suno kay Depasucat, santo sa ila imbestigasyon matapos ang insidente nanaog sa salakyan si Rafael kag ginhaboy sa kilid sang dalan ang gingamit sini nga armas-luthang.
Ginbalikan man sini si Alaba kag ginbuligan nga makapangayo sang bulig.
Gilayon naman nga gindala si Alaba sa ospital sang makita nga nagaginhawa pa ini, apang wala man ini nagdugay kag nadulaan sang kabuhi.
Pahayag ni Depasucat, sa sulod sang salakyan makit-an ang senyales nga may natabo nga kinagamo.
Kasubong man nga ang narekober nga basiyo sang bala ang yara sa sulod sang salakyan kag wala sang may makit-an sa gwa nga makapamatuod nga may persona nga nagtiro kay Alaba.
Sa karon, yara sa kustodiya sang Bacolod Police Station 4 si Rafael.