BACOLOD CITY – Natunga sa karon ang balatyagon sang boksidor nga si Ian Clark Bautista, nga tumandok sang Binalbagan, Negros Occidental, sa natalana sini nga away sa nagapadayon nga Southeast Asian (SEA) Games karon sa hapon.
Maatubang ni Bautista ang isa ka Malaysian puncher kag ang magadaog sa tunga sang mga ini ang magapauli sang bronze medal.
Sa exclusive interview sang Bombo Radyo Bacolod kay Bautista sa Good Morning, Philippines Program kaina sang aga, ginpahayag sini nga excited apang ginakulbaan siya para sa iya nga away las-3:00 karon sa hapon.
Apang ginpasiguro sini nga yara na siya sa kondisyon para sa away kag iya igahatag ang tanan agud madala pauli ang medalya.
Samtang, indi naman sini masiling kun ano nga pungsod ang pinakamabakod niya nga makaaway sa ibabaw sang ring.
Suno sa iya, indi mahimo i-underestimate ang sin-uman nga atleta sa SEA Games bangud palareho nga maayo ang mga ini.
Ginpahayag ni Bautista nga kinahanglan lamang ang determinasyon kag focus agud madaog sa kada away.
