Patay ang isa ka crew sang fishing boat gikan sa Victorias City matapos nga ginpaarakan lutghang sang Bantay Dagat sang Madridejos Cebu, kaina sang aga.
Sa interview sang Bombo Radyo kay Barry Bagaforo, tag-iya sang fishing boat, kahapon alas- 12:00 sang udto naglakat ang anum sini ka crew para managat apang kaina sang aga nakabaton ini sang mensahe gikan sa kapitan nga si alyas Janjan nga ginlaot sila sang bantay dagat kag ginpaarakan sang luthang.
Naiguan sa dughan ang crew nga si Rex Dela Cruz, kag ini ang ginbawian sang kabuhi.
Suno diri, may ginpadala na ini nga personnel nga maga-upod sa coast guard para magsugat sa iya crew.
Dugang pa ni Bagaporo, masami man sila nga magpadulong sa bahin sang Madridejos Cebu apang sa karun pa lamang may natabo nga insidente sang pagpangluthang.
Sa karun, ginhulat pa ang pagbalik sang crew para mapablotter ang natabo.
Samtang, nagahulat naman ang pamilya sang anum ka fishing crew sa ila nga pagbalik.
Sa interview sang Bombo Radyo kay Alan Abacaro, utod sang asawa ni alyas Dodoy nga isa sa crew sa fishing boat, ang crew ang ginalakipan sang iya bayaw nga si Rex Dela Cruz nga amo ang napatay, kapitan nga si alyas Janjan kag utod sini nga si alyas Toto, kag sanday Joel kag Alvin.
Suno diri, ang bayaw sini ang bag-o lamang nga crew sang fishing boat nga bag-o lang man narepair.
