Ginhatagan sang 30 ka adlaw si Dr. Mary Ann Maestral para magpreparar sa pag-assume sini sang iya bag-o nga designation bilang undersecretary sang Department of Health (DOH).
Si Maestral ang chief of hospital sang Teresita L. Jalandoni Provincial Hospital (TLJPH) sa Silay City.
Suno kay Maestral, hulaton sini ang pagbalik ni DOH Secretary, Dr. Teodoro Herbosa gikan sa luwas sang pungsod agud nga hibaluon kun diin siya i-assign.
Para kay Maestral, mas maayo para sa iya nga i-assign sa Visayas kag siya ang magapangita sang plastaran samtang naga-umpisa pa lamang ang Negros Island Region.
Sa karun, madamo pa sang dapat nga iprocess si Maestral agud nga mangin mahapos ang transition sini sa iya bag-o nga designation kasubong man sa magabulos sa iya bilang bag-o nga chief of hospital sang Teresita L. Jalandoni Provincial Hospital.
Gilayon naman nga nagpili si Governor Eugenio Jose ‘Bong’ Lacson sang bag-o nga chief of hospital sang TLJPH.
Suno kay Lacson, si Dr. Francis Gabriel Relota nga isa ka Medical Officer III kag amo ang chief-of-clinics sang provincial hospital, ang magabulos kay Maestral.
Suno kay Lacson, madugay na nga nagatrabaho sa ospital si Relota kag ginbaton man sini ang offer bilang pinuno sang provincial hospital.
Samtang, ginpasalamatan man sini ang nangin serbisyo ni Maestral kag dedikasyon sini sa padayon nga pagsanyog sang provincial hospital.
