BACOLOD CITY — Ginpanginbulahan sang Department of Education Negros Island Region ang Negrense softball team nga nangin 2nd placer ukon silver medalist sa Little League Seniors Division Softball World Series sa Estados Unidos bilang tiglawas sang Asia-Pacific Region.
Nahibaluan nga Lunes sang kaagahon, nalutos ang Negros Occidental Little League seniors batok sa host team nga Delaware District 3 Little League sa score nga 4-0.
Uyat sang probinsya ang 6 wins, 1 loss record sa pagtakop sang torneyo.
Sa exclusive interview sang Bombo Radyo kay Director Gilbert Sadsad direkta sa Delaware, ginpahayag sini nga mabakod gid man nga team ang Delaware.
Aminado ini nga nakapoy ang mga Negrense players bangud asud-asud ang anom nila ka match tubtub nga ila naatubang ang Delaware sa ikapito nga match.
Apang sa pihak sini, nakita sang regional director nga ginhimo sang mga players ang kutob sang ila masarangan batok sa mga Americano.
Subong nga Martes ukon sa Miyerkules sang aga, magaabot na diri sa Pilipinas ang Negrense softball team nagikan sa Estados Unidos.
Nahibaluan nga ini ang labing una nga kahigayunan nga nakasulod sa World Series ang seniors sang Negros Occidental.
