BACOLOD CITY — Antes lubos nga mabungkag ang Negros Island Region, pagahatagan sang Department of Education sang pagkilala ang Negros Occidental Little League Seniors nga nangin silver medalist sa Softball World Series nga ginpatigayon subong nga bulan sa Estados Unidos.
Madumduman nga napierde lamang ang Negrense softball team batok sa Delaware District 3 sa championship match sang World Series nga ginpatigayon sa Lower Sussex, Delaware.
Sa live studio interview sang Bombo Radyo Bacolod, ginpahayag ni Coach Tony Oquindo nga magapadulong ang team sa Dumaguete City bangud kadungan sang pag-award sang DepEd NIR sa mga tagdaog sa Search for Best Brigada Eskwela Implementers, hatagan man sang regional office sang pagkilala ang nalab-utan sang team.
Nagpasalamat si Oquindo sa ginpakita nga performance sang mga humalampang sa pag-atubang sa anom tanan ka nagkalain-lain nga teams sa bilog nga kalibutan.
Nagpalab-ot naman si Coach Roselle Hulleza sang pagpasalamat sa tanan nga mga nagbulig agud nga makaangkon sila sang oportunidad nga makapadulong sa Estados Unidos kag madala ang pangalan sang probinsya, pungsod Pilipinas kag Asia-Pacific region.
Nagalaom man siya nga kuntani magapadayon ang suporta sang tanan nga mga grupo nga nagsakdag sa ila sang nagsabak ang team sa World Series kalakip na ang Filipino community sa US.
Samtang, liwat nga nangin emosyonal ang pitcher sang team samtang ginahanduraw ang pagsabak nila sa Softball World Series sa Estados Unidos.
Una diri, ginpahayag ni Coach Roselle Hulleza nga 70 porsyento ang trabaho kag kontribusyon sang pitcher sa isa ka softball match bangud siya ang nagadala sang hampang.
Ini man ang rason kun ngaa dapat nga maghanas gid ang pitcher kun may yara man lang sang panahon nga mag-training.
Suno kay Hulleza, nakuha sang pitcher sang probinsya nga si Kaith Ezra Jalandoni ang world record sa ila nga pagsabak sa World Series sa Delaware, USA bangud sa kadasigon sa paghaboy sang bola gani siya ang gindayaw sang iban nga rehiyon.
Suno kay Kaith Ezra Jalandoni, nadevelop niya ang speed sa paghaboy sang bola sa husto nga training kag kondisyon sang kamot kag paminsaron.
Bisan 1st runner-up lamang ang team, ginakabig gihapon ni Jalandoni nga sila ang kampeon bangud sa tanan nga nagsuporta kag nagsubaybay sa ila nga hampang.
Emosyonal si Jalandoni samtang nagapasalamat sa tanan nga nagsakdag sa ila team ilabi na sa provincial government sang Negros Occidental nga nagsalig sa ila nga abilidad sa paghampang.
Suno sa pitcher, ila nabatyagan nga proud ang mga Negrense sa ila nalab-utan bisan ini ang labing una nga kahigayunan nga nakatapak sa World Series ang senior softball team.
