BACOLOD CITY — Liwat naman nga naka-angkon sang kalutusan ang Negros Occidental softball team sa majors division sang nagapadayon nga Little League Softball World Series sa Portland, Oregon sa Estados Unidos sa ikatatlo nila nga match kaina sang aga.
Alas 10:30 kaina sang aga, gin-atubang sang Negros Occidental team nga nagatiglawas sang Asia-Pacific region ang Lake Air Little League nagikan sa Waco, Texas nga tiglawas sang Southwest region.
Natapos ang match sa score nga 9-0, pabor sa American team.
Kahapon sang aga, nakatilaw man sang pagkapyerdi ang Negrense team matapos nga nagsabak sa second game.
Ala-1:00 kahapon sang kaagahon (oras diri sa Pilipinas) nag-atubangay ang Negrense team, nga may edad 11 tubtob 12 anyos, kag Floyds Knobs Community Club Little League gikan sa Floyds Knobs, Indiana.
Halos katunga lamang ang score sang Negros Occidental Little League majors, nga nagatiglawas sang Asia Pacific Region, nga nakakuha lamang sang tatlo ka puntos samtang pito ka puntos naman ang nakuha sang Floyds Knobs, nga tiglawas sang Central Region.
Ini na ang ikatatlo nga kapyerdihan sang Negrense softball team kun sa diin una na ini nga ginlutos sang South Beaverton Girls Little League nga gikan sa Beaverton City, Oregon kag amo ang host team.
